Putin: Sanksionet do të shkaktojnë rritje të çmimit të energjisë për Evropën

Keystone (AP Photo/RIA Novosti, Alexei Nikolsky, Presidential Press Service)

Sanksionet e vazhdueshme ndaj Rusisë mund të shkaktojnë një rritje katastrofike të çmimit të energjisë për familjet evropiane.

Kështu u shpreh presidenti rus, Vladimir Putin, këtë të premte në një takim me zyrtarë të lartë.

“Ne e dimë se evropianët po përpiqen të zëvendësojnë burimet ruse të energjisë. Megjithatë, ne presim që rezultati i veprimeve të tilla të çojë në rritjen e çmimit të gazit në treg dhe rritjen e kostos së burimeve të energjisë për konsumatorët fundorë”, u shpreh Putin.

Sipas tij, sanksionet ndaj Rusisë kanë shkaktuar shumë më tepër dëme për ato vende që i kanë vendosur.

Në muajt e fundit, Rusia ka ndërprerë furnizimet me gaz drejt Bullgarisë, Polonisë, Finlandës, furnizuesit danez Orsted, firmës holandeze Gasterra dhe Shell-it.

Kjo për shkak të refuzimit të tyre për të kryer pagesën në rubla, të kërkuar nga Putin si përgjigje ndaj sanksioneve nga vendet perëndimore për luftën në Ukrainë, shkruan Reuters, përcjell albinfo.ch.