Putin kërkon falje për rrëzimin e aeroplanit të Azerbajxhanit

Keystone (AP Photo/RIA Novosti, Alexei Nikolsky, Presidential Press Service)

Presidenti rus Vladimir Putin i ka kërkuar falje presidentit, Ilham Aliyev pas rrëzimit të avionit të Azerbajxhanit në Kazakistan që rezultoi në vdekjen e 38 personave, sipas Kremlinit.

“Vladimir Putin kërkoi falje për incidentin tragjik që ndodhi në hapësirën ajrore ruse”, njoftoi sot Kremlini në Moskë – pas një bisede telefonike mes dy liderëve.

Putini thuhet se ka shpjeguar se në atë kohë, mbrojtja ajrore ruse po kundërshtonte në mënyrë aktive sulmet ukrainase me dronë.

Megjithatë, ai nuk deklaroi qartë se mbrojtja ajrore e kishte goditur avionin me raketë.

“Putini shprehu edhe një herë ngushëllimet e tij të thella dhe të sinqerta për familjet e viktimave dhe u uroi të plagosurve një shërim të shpejtë”, tha Kremlini.

Avioni i pasagjerëve të Azerbajxhanit, i cili ishte nisur nga Baku në drejtim të Grozny, kryeqyteti i republikës ruse të Çeçenisë, u rrëzua të mërkurën në Kazakistan.

Gjatë bisedës telefonike mes Putinit dhe Aliyev, u vu re se avioni i pasagjerëve të Azerbajxhanit kishte tentuar vazhdimisht të ulej në aeroportin e Groznit.

“Në të njëjtën kohë, Grozny, Mozdok dhe Vladikavkaz po sulmoheshin nga dronët luftarakë ukrainas, të cilët mbrojtja ajrore ruse i zmbrapsi”, njoftoi Kremlini.

Vladikavkaz është kryeqyteti i republikës ruse të Osetisë së Veriut. Mozdok ndodhet gjithashtu në Osetinë e Veriut.

Hetimet fillestare kishin ngritur dyshimin se avioni që u rrëzua mund të ishte dëmtuar nga shpërthimi i një rakete kundërajrore.