Publikohet raporti i autopsisë në rastin e 27-vjeçares italiane

Gjatë ditës së sotme janë bërë të ditura detaje të reja në lidhje me rastin tragjik, ku dyshohet se 26-vjeçarja italiane Vanessa Ballan, para disa ditësh u vra nga ish i dashuri i saj nga Kosova, Bujar Fandaj.

Me rastin e publikimit të raportit të autopsisë, siç bëjnë të ditur mediat italiane, viktima fillimisht ishte rrahur brutalisht, e më pas ishte vrarë nga ish i dashuri i saj, ndërsa nga ekzaminimi u konstatuan mavijosje në kokë dhe fytyrë, si dhe disa plagë në duar, të cilat besohet se i ka marrë gjatë tentativës për t’u mbrojtur, përcjell albinfo.ch.

Tutje, bëhet e ditur se gruaja e cila ishte shtatzënë u godit dy herë në mushkëri, dhe më pas u qëllua me thikë në zemër, ndërsa thuhet se 41-vjeçari raportohet se e ka goditur viktimën e tij tetë herë me thikë.

Sipas raportit, 27-vjeçarja kishte arritur afërsisht javën e 12-të të shtatzënisë.

Ndryshe, pas një viti lidhje, italianja kishte vendosur t’i jepte fund gjatë verës, por shqiptari nga Kosova nuk e kishte pranuar këtë gjë dhe raportohet se kishte filluar ta përcillte atë duke u shfaqur disa herë në vendet ku ajo punonte, apo dhe në shtëpinë e saj duke e kërcënuar se do ta vriste në rast se nuk ribashkoheshin.