Pse shumica e të burgosurve të Zvicrës nuk janë zviceranë

Pothuajse tre të katërtat e të gjithë të burgosurve në burgjet zvicerane janë me origjinë të huaj, sipas një studimi të fundit të Këshillit të Evropës. Një nga autorët shpjegon faktorët që qëndrojnë pas statistikave.

Në Evropë, mesatarisht 15.9% e të paraburgosurve janë të huaj; në Zvicër shifra qëndron në 71.4%, sipas një studimi të kohëve të fundit mbi burgjet në Evropë nga Marcelo Abi dhe Mélanie M. Tiago nga Universiteti i Lozanës, i porositur nga Këshilli i Evropës. Shifrat për Evropën Veriore dhe Perëndimore janë shumë më të larta se sa për Europën Qendrore dhe Lindore, përcjell albinfo.ch.

Katër vendet e para në lidhje me të burgosurit e huaj kanë popullsi shumë të vogël: Monako (39,000 banorë), Andorra (80,000), Lihtenshtajni (38,000) dhe Luksemburgu (600,000). Në mesin e vendeve me mbi një milion banorë, Zvicra renditet e para.

Nga numri i përgjithshëm i popullsisë së burgjeve prej 6,863 personave në vitin 2017, 49.3% ishin banorë të ligjshëm (zviceranë dhe jo-zviceranë), 9.6% ishin azilkërkues dhe 41.1% u klasifikuan “të huaj të tjerë (përfshirë të huajt me status të panjohur)”, përcjell albinfo.ch.

Sipas Zyrës Federale të Statistikave, kjo kategori e fundit mbulon “të huajt pa vendbanim fiks në Zvicër, punëtorë ndërkufitare me leje G, emigrantë pa dokumente dhe turistë”.

Të huajt pa vendbanim fiks në Zvicër përfaqësojnë 34% të popullatës së burgut. Në paraburgim, ata ishin 49% e të gjithë të burgosurve.

Ata që qëndrojnë prapa hekurave në Zvicër janë “kryesisht meshkuj, urbanë dhe të rinj, pavarësisht nga origjina e tyre”, vëren Abi. Vetëm 5.5%  janë femra, përcjell albinfo.ch.

Abi shton se pasi që popullsia e huaj e Zvicrës është dyfishuar që nga vitet 1990, ata me një pasaportë zvicerane po bëhen më të vjetër dhe të huajt priren të jenë më të rinj. Ai sheh një ndikim të tërthortë mbi figurat e krimit dhe popullsinë e burgjeve, të përbërë kryesisht nga burrat e moshës 20 deri në 50 vjeç.

Në vitin 2010, 52.9% e votuesve zviceranë mbështetën një nismë popullore për të deportuar automatikisht kriminelët me origjinë të huaj, duke marrë parasysh të drejtat themelore të njeriut.

Ligji për zbatimin e kësaj nisme hyri në fuqi në tetor 2016.

Për krime si vrasja, lëndime të rënda trupore apo mashtrime, autoritetet duhet të deportojnë një të pandehur të huaj për një periudhë prej pesë deri në 15 vjet, përcjell albinfo.ch.

Ministrja e Drejtësisë Karin Keller-Sutter kohët e fundit tha se ende është tepër herët për të marrë në konsideratë zbatimin e iniciativës dhe efekteve të saj.