Pse po shkakton polemika plani për një tren midis Zvicrës dhe Suedisë?

Parlamenti i Zvicrës dëshiron të subvencionojë një tren të ri nate që lidh Bazelin me Malmön në Suedi, por jo të gjithë janë dakord. Pse ndodh kjo?

Qeveria e Zvicrës është e përkushtuar për të zgjeruar linjat ndërkombëtare midis qyteteve zvicerane dhe atyre evropiane.

Për shembull, në vitin 2026 pritet të qarkullojnë dy trena shtesë në secilin drejtim midis Cyrihut dhe Milanos. Lidhja direkte me Bolonjën do të zgjerohet deri në Firence, ndërsa treni veror për në Gjenovë do të vazhdojë deri në La Spezia.

Midis Zvicrës dhe Francës, një tren direkt nga Lozana, nëpërmjet Gjenevës, do të shkojë në Marsejë sipas sezonit, nga prilli deri në tetor, duke qarkulluar nga e enjtja deri të hënën.

Orari i ri për vitin 2026 do të ofrojë gjithashtu më shumë komoditet për pasagjerët e trenave të natës. Trenat modernë Nightjet me mini kabina dhe me tualete e dushe private do të lidhin Cyrihun dhe Bazelin me Hamburgun, Amsterdamin dhe Vjenën, përcjell albinfo.ch.

Më vonë, Zvicra synon të ketë edhe një lidhje direkte me Mbretërinë e Bashkuar. Gjithashtu, duke filluar nga prilli i vitit 2026, pritet që tre trena nate në javë të qarkullojnë midis Bazelit dhe Malmö-s, nëpërmjet Kopenhagenit, në secilin drejtim, pra gjithsej gjashtë herë në javë.

Të paktën, ky është plani, edhe pse disa deputetë duan ta ndalin.

Cili është problemi?

Parlamenti ka vendosur të ndajë 30 milionë franga në vit për lidhjet ndërkombëtare hekurudhore gjatë gjashtë viteve të ardhshme. Megjithatë, për të ulur shpenzimet, kësti i parë për këtë vit u ul në 10 milionë franga.

Këshilli Federal ka bërë të ditur se nuk dëshiron ta tejkalojë këtë shifër as në vitet e ardhshme. Kjo lë në dispozicion vetëm 60 milionë franga, nga 180 milionët që ishin parashikuar fillimisht, për t’u përdorur për rrjetin ndërkombëtar të trenave.

Zyra Federale e Transportit ka vendosur të ndajë pjesën më të madhe të këtyre parave, plot 47 milionë franga, për një projekt të vetëm, pikërisht për linjën e re nga Bazeli në Malmö, shkruan The Local.

Kjo do të thotë se për çdo udhëtim me tren në këtë linjë do të shpenzohen rreth 30 mijë franga.

Sipas zëdhënëses së kompanisë hekurudhore SBB, Sabrina Schellenberg, këto para do të përdoren për koston e shtigjeve të trenave dhe të energjisë, por edhe për mjetet lëvizëse dhe personelin.

Shpërdorim i parave të taksapaguesve?

Jo të gjithë deputetët janë dakord me këtë mënyrë të shpenzuari. Për deputetin Thomas Hurter nga Partia Popullore Zvicerane, që është edhe anëtar i Komisionit parlamentar të Transportit, një subvencion prej 30 mijë frangash për një udhëtim me tren është një ide e keqe.

“Unë besoj se kjo është në thelb një shpërdorim i parave të taksapaguesve sepse SBB po investon në një linjë që nuk ka domosdoshmërisht një të ardhme, dhe paratë do të ishte më mirë të përdoren për linjat ekzistuese,” tha ai.

Çfarë pritet të ndodhë tani?

Është ende herët për të thënë.

Kjo sepse ende nuk është e sigurt nëse fondet për këtë shërbim të ri të trenit të natës nga Bazeli në Malmö do të miratohen. Parlamenti duhet të votojë mbi financimin çdo dhjetor si pjesë e debatit për buxhetin federal.

---