Pse po bie euro?

Ekspertët pohojnë se ecuria e kursit do të varet nga shpejtësia me të cilën bankat do të bëjnë këto konvertime, por gjithsesi shumat e mëdha ndikojnë në ecurinë e kursit

Euro ka vazhduar rënien, duke vijuar të vendosë rekorde të reja të 10 viteve të fundit.

Sipas kursit zyrtar të Bankës së Shqipërisë, një euro u këmbye me 126.64 lekë, me një rënie prej 0.1 lekë në krahasim me ditën e mëparshme dhe duke shënuar gjashtë ditë radhazi me nënçmim dhe nivelin më të ulët nga fillimi i shkurtit të vitit 2009. Si rrjedhojë monedha e përbashkët i ka humbur pikët që fitoi nga mesi i majit.

Ekspertët pohojnë se krahas faktorëve të tjerë që kanë rritur në mënyrë të qëndrueshme ofertën për valutë, si burimet informale dhe ato formale, në rënien e shpejtë të tij po ndikojnë dhe bankat, të cilat pas procesit të shit blerjeve po kryejnë konvertimin e kapitalit nga euro ne lekë, çka ka shtuar ofertën për valutë ne treg, shkruan ‘Monitor’.

Ekspertët pohojnë se ecuria e kursit do të varet nga shpejtësia me të cilën bankat do të bëjnë këto konvertime, por gjithsesi shumat e mëdha ndikojnë në ecurinë e kursit.

Një fakt të tillë e ka konfirmuar dhe zëvendës guvernatorja e Bankës së Shqipërisë, znj. Elisabeta Gjoni.

Por, ajo thekson se efekti i këtyre veprimeve, të cilat janë të rralla, është tërësisht i përkohshëm. “Për më tepër, bankat po tregojnë kujdesin e duhur që veprimet të shtrihen maksimalisht në kohë dhe të kryhen në momentet më të përshtatshme”, ka pohuar znj.Gjoni.

Deri në fund të verës, pritet të ndikojnë dhe prurjet e turizmit dhe emigrantët, që e bëjnë jo pozitive perspektivën e euros.