Propozimet e lehtësuesit Cooper

Në takimin e parë mes delegacionit të Kosovës dhe Serbisë do të diskutohet për CEFTA-n, doganat dhe librat kadastralë

Ashtu siç është paralajmëruar, bisedimet nisin me tema të ashtuquajtura të lehta. Burime të gazetës kosovare “Express”, të afërta me kabinetin e shefes së diplomacisë evropiane, Catherine Ashton, kanë treguar tri temat që do të diskutohen mes palës kosovare dhe asaj serbe.

　

Në takimin e parë mes delegacionit të Kosovës dhe Serbisë do të diskutohet për CEFTA-n, doganat dhe librat kadastralë.

　

“Me këto tema nis dialogu i shumëpërfolur mes Prishtinës dhe Beogradit”, ka thënë një diplomat evropian.

　

Burime të gazetës Express thonë se ndërmjetësuesi i BE-së, Rober Cooper do të propozojë që takimet e ardhshme të CEFTA-s të mbahen sipas formulës Guemnich.

Derisa zgjidhjen për funksionalitetin e Pikës 1 dhe 31 të Doganës së Kosovës, ai e sheh tek aplikimi i vulës me mbishkrimin “Kosovo”, e jo “Republika e Kosovës”, apo “Kosovo/UNMIK”, siç kërkon Serbia.

　

“Ne besojmë se zgjidhja më e mirë për funksionimin e CEFTA-s është aplikimi i formulës Guemnich. Kjo formulë është përkrahur si në Beograd, ashtu edhe në Prishtinë”, ka thënë zyrtari evropian.

　

Në takimin e parë mes Prishtinës dhe Beogradit, që zhvillohet më 8 mars në Bruksel, nuk pritet të arrihet ndonjë marrëveshje, por evropianët po insistojnë që ky takim të kalojë në frymë konstruktive për temat që do të diskutohen.

　

Kosova në takim përfaqësohet nga Zëvendëskryeministrja Edita Tahiri, derisa udhëheqës i delegacionit serb do të jetë Borko Stevanovic.

---