Pronari i autobusit reagon pas raportimeve në Serbi: S’ka aksident tragjik, vetëm një gërvishtje

S’ka aksident të rëndë në Serbi, flet pronari i autobusit nga Kosova: Ishte gërvishtje e vogël

Pas raportimeve në disa media serbe për një aksident të rëndë me autobus nga Kosova në afërsi të Krushevcit, kompania kosovare “Zhitia Tours” ka reaguar duke hedhur poshtë këto pretendime, duke i cilësuar si të pavërteta dhe të ekzagjeruara, përcjell albinfo.ch.

Në një prononcim në rrjetet sociale, përfaqësues të kësaj kompanie kanë deklaruar se nuk ka pasur asnjë pasagjer në autobus dhe se bëhet fjalë vetëm për një gërvishtje të vogël mes dy automjeteve.

“Ka ndodhur një aksident i lehtë, miniaksident, thjesht një gërvishtje. Dëmet materiale janë minimale, rreth 100 euro. Nuk ka të lënduar, nuk ka pasagjerë – ishim vetëm dy shoferë në autobus”, ka thënë përfaqësuesi i “Zhitia Tours”-it.

Ngjarja ka ndodhur në fshatin Qeli, në afërsi të Krushevcit në Serbi dhe nuk përbën asnjë rrezik apo pasoja për qytetarët.

---