Prodhimet e Kosovës ende kanë shumë sfida për tu prezantuar jashtë vendit

Përfaqësuesi i BE-së; "Prodhimet e Kosovës ende kanë shumë sfida për tu prezantuar jashtë vendit. Kërkoj angazhimin e të gjitha instancave shtetërore për mbështetjen e bizneseve që eksportojnë prodhime jashtë vendit”

Është hapur Panairi Regjional Vjeshtor i Ndërmarrësve në qytetin e Gjilanit. Me pjesëmarrje nga të gjitha komunat e regjionit të lindjes, në këtë panair për dy ditë me radhë do të ekspozohen produkte të ndryshme të prodhimit dhe punës së bujqve, biznesit dhe ndërmarrësve që veprojnë në Gjilan.

Ky panair u mundësua nga Agjensioni për Zhvillim Rajonal-Lindje, Komuna e Gjilanit dhe zyra e Bashkimit Evropian. Përfaqësuesi i zyrës së BE-së në Kosovë, Mia Pazel, ka thënë se ende mbetet një sfidë e madhe për bizneset në vend.

“Prodhimet e Kosovës ende nuk janë prezentë sa duhet në tregun e shteteve fqinje. Kërkoj angazhimin e të gjitha instancave shtetërore për mbështetjen e bizneseve që eksportojnë prodhime jashtë vendit”, tha ai.

Ndërsa drejtoresha e RDA-së në Gjilan, Valbona Tahiri, me rastin e hapjes së panairit të ndërmarrsisë ka thënë se kjo është një mundësi shtesë për bizneset e vogla dhe të mesme që të rriten dhe krijojnë ura lidhëse mes vete për të nxitur shitjen e produkteve të prodhuara në Gjilan dhe Anamoravë.

Kurse, kryetari i Gjilanit, Lutfi Haziri, ka konfirmuar vazhdimin e mbështetjes për ndërmarrësin dhe prodhimet vendore në përgjithësi.