Privatizimi i PTK-së në prag të dështimit

Afati i fundit për t’ia nënshkruar kompanisë fituese kontratën për PTK-në ka qenë mesnata e së hënës. Qeveria e Kosovës duket se e ka shpallë të dështuar shitjen e PTK-së

Në pamundësi që të kalojë nëpërmjet Kuvendit të Kosovës, Qeveria në Prishtinë duket se e ka konsideruar të dështuar shitjen e 75 për qind të aksioneve të Postës dhe Telekomit të Kosovës (PTK). Kështu deklarojnë mediat në Kosovë duke u bazuar në burimet brenda qeverisë Thaçi.

Një anëtar i kabinetit qeveritar ka konfirmuar për KTV-në, se qeveria nuk e ka nënshkruar marrëveshjen me grupin AXO-S që e kishte blerë PTK-në, për faktin se kjo nuk ka kaluar nëpër Ligjvënës.

Afati i fundit për t’ia nënshkruar kompanisë fituese kontratën për PTK-në ka qenë mesnata e së hënës.

Ndryshe, Qeveria ende nuk ka dalë me njoftim zyrtar dhe për këtë çështje ka diskutuar gjatë gjithë ditës së djeshme.

Partia në pushtet, PDK-ja, dështoi ta miratojë buxhetin bashkë me PTK-në, duke e hequr këtë pikë nga ligji që ma pas kaloi në Kuvend. Pritet që procesi të nisë nga fillimi, por vlera e PTK-së mund të bie dukshëm. Gjithashtu, mund të ketë padi për qeverinë e Kosovës nga ana e blerësve.

Ndryshe, PTK ka qenë një ndër temat kryesore që është diskutuar gjatë vitit që po mbetet pas. Madje kjo çështje u bë “mollë sherri” që Kuvendi i Kosovës të ndërpresë punimet për tri katër seanca, pasi që opozita kundërshtonte që kjo shitja e PTK-së të kalojë nëpërmjet kuvendit.