“Princesha Ardita”, shfaqje muzikore me kukulla, gjermanisht dhe shqip

Teatri i Kukullave në Winterthur e luan përrallën në gjermanisht dhe shqip ndërsa Roberto González-Monjas, në "gjuhën" e muzikës

Shfaqja muzikore me kukulla “Princesha Ardita” mbështetet në librin me figura të përrallave të autorëve Silvia Hüsler dhe Mahir Mustafa. Me muzikë nga Christoph Willibald Gluck, Antonio Salieri dhe Ludwig van Beethoven, ajo do të jepet në gjermanisht dhe shqip, thuhet në një njoftim të orkestrës Music Kollegium të qytetit Winterthur, shkruan albinfo.ch.

Fëmijët që jetojnë në Zvicër flasin shumë gjuhë, mes tyre edhe shqip. Autorja dhe ilustruesja e njohur e librave për fëmijë, Silvia Hüsler, prej vitesh i është përkushtuar letërsisë shumëgjuhëshe për fëmijë. Kur Mahir Mustafa i tregoi përrallën që e dinte nga gjyshja, lindi ideja për librin dygjuhësh, të cilin e ka botuar Lehrmittelverlag Cyrih.

Në vazhdim, fabula e librit: Princesha e zgjuar dhe simpatike Ardita përfundimisht nuk dëshiron të martohet. Dhe nëse megjithatë duhet, atëherë ajo do të pranojë vetëm atë burrë që di të fshihet aq mirë sa nuk mund ta gjejë. Asnjë nga princat dhe kapedanët e pasur nuk do të kenë sukses në këtë, sepse Ardita ka një teleskop të jashtëzakonshëm, me të cilin mund të gjejë shumë vende të fshehta.

Në të njëjtën kohë, një i ri me emrin Agim jeton në fshat. Kjo histori e lumtur tregon atë që ai përjeton dhe se si të dy më në fund bëhen bashkë. Teatri i Kukullave në Winterthur e luan përrallën në gjermanisht dhe shqip ndërsa Roberto González-Monjas kontribuon me një gjuhë të tretë, gjuhën e muzikës klasike.

Music Kollegium që bën shoqërimin muzikor të shfaqjes është një ndër orkestrat simfonike profesionale me traditë më të gjatë në Evropë.

Shfaqja zgjat 60 minuta, pa pauzë.

 

Koha:

E premte, 11 prill 2025. Ora: 17.00

E shtunë 12 prill 2025. Ora 15.00

Stadthaus Winterthur
17.00 Uhr
Biletat: CHF 20 | Për fëmijë: CHF 10
Me  ZKB-Kartë,  20% më lirë

---