Presidentja Osmani: Është e domosdoshme që Kosova të anëtarësohet në NATO

Foto Facebook: Vjosa Osmani

Presidentja e Kosovës, Vjosa Osmani, ka thënë se vetëm anëtarësimi në NATO i të gjitha shteteve të Ballkanit Perëndimor, të cilat mëtojnë një gjë të tillë, do të mund të ketë efekt për stabilitet afatgjatë për rajonin.

“Duke ditur sfidat e sigurisë në të cilat po kalon kontintenti e rajoni është e domosdoshme që Kosova të bëjë hapa përpara drejt anëtarësimit në NATO, duke filluar me Partneritetin për Paqe, vetëm anëtarësimi në NATO i të gjitha shteve të Ballkanit Perëndimor të cilat mëtojnë një gjë të tillë, do të mund të ketë efekt për stabilitet afatgjatë për rajonin tonë”, ka deklaruar presidentja Osmani.

E para e vendit në një konferencë të përbashkët me homologun nga Bullgaria, Rumen Radev, ka thënë se është e domosdoshme që Kosova të bëjë hapa përpara drejt anëtarësimit në NATO, duke filluar me Partneritetin për Paqe.

Ajo ka falënderuar Bullgarinë për mbështetjen e vazhdueshme ndaj Kosovës dhe ka kërkuar që ta mbështesë edhe anëtarësimin e Kosovës në NATO.

Osmani ka deklaruar se shpreson edhe në anëtarësimin në BE, duke shtuar tutje se mosanëtarësimi jep mundësi për destabilizim.

“Udhëheqja e guximshme dhe vendimet dhe vendimtare të aleatëve tanë janë të nevojshme për të përshpejtuar pranimin bazuar në merita të vendeve të rajonit në BE dhe NATO. Çdo hezitim do të krijonte boshllëk, duke u dhënë mundësi aktorëve keqdashës ta destabilizojnë jo vetëm Kosovën, por rajonin”, ka theksuar Osmani.

Ndryshe, presidenti i Bullgarisë po qëndron për vizitë zyrtare në Kosovë.

Ai pritet të takohet edhe me kryeministrin e Kosovës, Albin Kurti.