Presheva tubon gratë intelektuale shqiptare

Të dielën, në Preshevë dhe në Bujanoc u mbajt Kuvendi IX i gruas intelektuale shqiptare mbarëkombëtare, në organizim të fondacionit “Nermin Vlora Falaschi”.

Më se 100 delegate nga Italia, Gjermania, Greqia, Turqia, Kosova, Mali i Zi, Maqedonia dhe nga Lugina e Preshevës, për dy ditë radhazi kanë zhvilluar punimet e këtij kuvendi së pari në Preshevë, pastaj edhe në Bujanoc.

Temë e Kuvendit të sotëm mbarëkombëtar ishte “Roli dhe kontributi i gruas intelektuale shqiptare për gjatë historisë si faktor bashkëjetese në etni dhe integrimi në hapësirën evropiane”, ku diskutimet e shumta, propozimet dhe vendimet e marra në këtë Kuvend u vlerësuan si mjaft të  rëndësishme.

Përfaqësueset e këtij fondacioni paralajmëruan edhe mbajtjen e Kuvendit X që, siç paralajmëruan ato, do të mbahet në Bruksel, më 18 prill të vitit të ardhshëm, në ditën e 90-vjetorit të lindjes së ambasadores së kombit, Nermin Vlora-Falaschi.