Prej 1 shtatorit do të ketë ndryshime lidhur me tarifën në Rrugën e Kombit

Bizneset që kalojnë në Rrugën e Kombit që prej 1 shtatorit do të detyrohen që të paguajnë në bazë të peshës së kamionëve. Kjo edhe përkundër faktit se eksportuesit janë ankuar për efektet negative që ka pasur kjo taksë, e cila ka ulur nivelin e tregtisë midis dy vendeve.

Automjetet e vogla që kalojnë në Rrugën e Kombit janë të detyruara që të paguajnë 5 euro me TVSH, autobusët 11 euro, kamionët e mesëm 16 euro dhe kamionët e rëndë 23 euro.

Kompania koncesionare pritet të vendosë montimin e peshoreve për kamionët. Peshoret do të shërbejnë për monitorimin e automjeteve të rënda dhe për diferencimin e tarifës që shkon nga 16 euro deri në 23 euro për kamionët e rëndë.

Kjo masë, sipas argumentit të kompanisë, ka ardhur me kërkesë të qeverisë shqiptare dhe qëllimi është mbrojtja e elementëve rrugorë, shtresat e rrugës nga dëmtimet e mundshme që vijnë si pasojë e qarkullimit të mjeteve të rënda.

Tarifa e vendosur në Rrugën e Kombit është kthyer në një pengesë serioze për bizneset, të cilat i kanë bërë thirrje qeverisë që të gjejë një zgjidhje.

Të dhënat zyrtare të Instat tregojnë se eksportet kanë rënë me 2.6% dhe ndikimin kryesor e ka dhënë ulja e eksporteve të materialeve të ndërtimit drejt Kosovës.

“Taksimi i Rrugës së Kombit ka një ndikim të drejtpërdrejtë në rënien e eksporteve të materialeve të ndërtimit”.

Ndërkohë zyrtarë kosovarë i kanë kërkuar qeverisë shqiptare që të diskutojnë për gjetjen e një zgjidhjeje.

Taksa në Rrugën e Kombit u vendos vitin e kaluar dhe u prit me protesta si nga banorët, ashtu edhe nga bizneset, raportojnë mediat kosovare.