Power: Marrëveshja për themelimin e Asociacionit duhet të zbatohet

Twitter: Samantha Power

Administratorja e Agjencisë Amerikane për Zhvillim Ndërkombëtar, Samantha Power, ka përsëritur kërkesën e Shteteve të Bashkuara të Amerikës për themelimin e Asociacionit të komunave me shumicë serbe.

Gjatë qëndrimit në Kosovë, Power tha se AKS duhet t’u përmbahet parimeve që i kanë paraqitur këshilltari i Departamentit Amerikan të Shtetit, Derek Chollet, dhe emisari për Ballkanin Perëndimor, Gabriel Escobar, përcjellë albinfo.ch.

“Normalizimi do të jetë shumë i mirë dhe dobishëm edhe për biznesin. Kemi pasur diskutime edhe për urgjencën e krijimit të Asociacionit, por edhe zbatimit të plotë të gjitha aspekteve të marrëveshjes. Po ashtu kemi shpresë që palët do të kalojnë në fazën e ardhshme të dialogut me propozime specifike. Ne e kemi bërë shumë të qartë nëpërmjet zotëri Cholletit dhe Escobarit se cilat janë parimet dhe po ashtu besojmë se çdo asociacion do t’iu përmbahet atyre kushteve”, u shpreh ajo.

Mes tjerash, Power tha se dialogu mes Kosovës e Serbisë duhet të përfundojë me njohje reciproke.

“Gjithmonë ka qenë pozicioni i Shteteve të Bashkuara që ky proces duhet të përfundojë me njohje reciproke dhe ky mbetet qëndrimi ynë. Por tani fokusi ynë është në rëndësinë e Asociacionit dhe rëndësinë që serbët e Kosovës të kthehen në institucionet e Kosovës sa më parë që të jetë e mundur”, deklaroi ajo.