Portugezët në qiellin e shtatë

Ata kanë thënë se meritë ka edhe Cristiano Ronaldo, që i motivoi në dhomat e zhveshjes

Trajneri dhe futbollistët e Portugalisë ishin shumë të lumtur me triumfin në finalen e Kampionatit Evropian. Portugalia në finale mundi Francën 1:0, shkruan albinfo.ch.

Trajneri i Portugalisë, Fernando Santos ishte shumë i lumtur. “Jam shumë i lumtur. Para së gjithash dua të them dy gjëra. Falënderoj Zotin, më pas familjen time, nënën time, babanë tim, kudo që të jetë. Shpresoj që të ketë pirë ndonjë birrë. Dhe falënderoj Greqinë”, tha ai për mediat pas ndeshjes.

Ndërsa Cristiano Ronaldon e cilësoi një shembull në fushë dhe në dhomat e zhveshjes, duke i dhënë kurajë ekipit paçka se kishte dalë nga fusha i dëmtuar në pjesën e parë. “Cristiano ishte shembullor, provoi të qëndronte në fushë, por personaliteti i tij ishte shumë i fortë si në fushë, ashtu në dhomat e zhveshjes. Merituam të fitonim. Kemi një të ardhme të ndritur, por sot duhet të festojmë”, ka thënë Fernando Santos pas fitores së trofeut.

Mbrojtësi portugez, Pepe, është shprehur se ishte një ndeshje shumë e vështirë, sidomos pas lëndimit të Cristiano Ronaldos, por theksoi se fitorja ishte pikërisht për të. “Kishte shumë vuajtje, një ndeshje e tensionuar. Luftuam shumë, duhet të punonim më shumë dhe të ishim më të përulur se kundërshtari, kjo është mënyra e vetme që të fitosh. Dhamë gjithçka në fushë, është mënyra e vetme që të fitojmë. Ne prezantuam Portugalinë, një vend i bukur i emigrantëve dhe ne përfaqësojmë secilin prej tyre, kjo shkon për ata”, është shprehur Pepe.

Ai foli edhe Ronaldon, për të cilin tha se mund ta bënte diferencën në fushë. “Ishte shumë e vështirë që ta humbim njeriun kryesor të skuadrës. Lojtar që mund të shënojë në çdo moment. Ai mund të bënte diferencën, por ne ishim luftëtarë në fushë. Thamë se do ta fitojmë trofeun për të dhe ia dolëm”, ka thënë lojtari i Real Madridit.

Heroi i ndeshjes, Eder, ishte i lumtur me triumfin. “Kjo fitore është rezultati i të gjithë punës që bëmë këtu. Është fantastike. E merituar. Të gjithë jemi të lumtur. Që nga dita e parë e grumbullimit, e ndjeja që Fernando Santos

kishte besim te aftësitë e mia. Kishte besim te unë. Sot ishte e mundur të jepja kontributin tim. Jam shumë i lumtur”, tha ai pas ndeshjes.

Eder zbuloi gjithashtu se Cristiano Ronaldo e kishte parashikuar golin e tij në finale. “Ai më tha se do të isha unë që do të shënoja golin e fitores, ashtu si edhe kolegë të tjerë. Kjo më dha forcë dhe energji. Ky ishte një gol për të cilin kisha punuar shumë dhe që ia kushtoj popullit portugez që e meriton”, deklaroi ai.