Populli i Kantonit të Bernës voton kundër shkurtimit të ndihmave sociale

Refuzimi i këtij shkurtimi vjen i befasishëm për një kanton të dominuar dukshëm nga e djathta...

Në ditën e fundit të “votimeve” siç quhen ditët e shpërndara në intervale të caktuara, disa herë brenda vitit, atë të 19 majit, janë zhvilluar dy referendume në nivel nacional.

Por, krahas tyre, në Zvicër, që njihet si vendi më tipik i demokracisë së drejtpërdrejtë janë zhvilluar edhe dhjetëra votime dhe referendume në nivele kantonesh dhe komunash, për çështje nga më të ndryshmet, shkruan albinfo.ch.

Njëri ndër votimet që kanë ngjallur interes më të madh, edhe përtej kantonit ku u zhvillua, ishte votimi popullor në Kantonin e Bernës për shkurtimin e ndihmave sociale. Dhe, trupi votues i këtij kantoni, me 52.6% u përcaktua kundër këtij shkurtimi.

Rishikimi i ligjit mbi ndihmat sociale, ose shkurtimi i ndihmave sociale, sikur të votohej nga shumica, do të bënte që niveli i mbulimit të nevojave bazike të ulej nën standardet që parasheh Konferenca Zvicerane për Ndihma Sociale.

Refuzimi i këtij shkurtimi vjen i befasishëm për një kanton të dominuar dukshëm nga e djathta dhe konsiderohet në një masë edhe si përcaktues për kantonet tjera, ku është duke u kërkuar po ashtu shkurtimi në fjalë, shkruan srf.ch.

---