Politikani artist

Vizita e e sotme në Bernë e kryeministrit të Shqipërisë, Edi Rama është e para që nga rrëzimi i komunizmit në Shqipëri. Gazeta Luzerner Zeitung në një koment të saj e shpall Ramën “Kokë të ditës”, duke prezantuar disa nga karakteristikat dalluese të personalitetit karizmatik që qëndron në krye të Shqipërisë.

Veçoritë fillojnë me pamjen e zyrës së tij. Pasi radhit zyrat presidenciale të disa shefave të shteteve në botë, gazetari e cilëson zyrën e Ramës si më speciale. “Në korridor është vendosur një kosh basketbolli. Muret, në sipërfaqe të mëdha janë tapetuar me piktura laramane. Janë krijime personale të Edi Ramës, sepse kryeministri shqiptar është artist i diplomuar”. Më tutje artikulli flet për kohën kur Rama kishte filluar të merrej me art, ishte bërë docent në Fakultetin e Arteve dhe kishte marrë pjesë në protestat kundër regjimit komunist. Pas rrëzimit të rendit komunist, Rama shkon për të jetuar ëndrrën e tij artistike për disa vite në Paris. Në vitin 1998 kthehet në Shqipëri ndërsa në vitin 2000 zgjidhet kryebashkiak i Tiranës, post në të cilin qëndron 11 vjet. Nga kjo kohë ka mbetur ngjyrosja e fasadave të ndërtesave të qytetit, me çka është hequr qafe pamja e zymtë e tyre. Ndërsa me pikturën, Rama merret gjithë kohën. Edhe kur ishte ministër kulture, ai pikturonte gjatë mbledhjeve, gjë që e bën edhe sot.

Por nuk ka vetëm lëvdata për Ramën. Kritikët thonë se ai po bëhet gjithnjë më shumë arrogant dhe i fuqishëm. Akuzohet se ai, i vetëproklamuar si luftëtar kundër korrupsionit, deri tash është sjellë edhe në mënyrë oportuniste me politikanë të njohur si të korruptuar.

Pas zgjedhjes së tij për kryeministër në vitin 2013 gazeta NZZ shkruante se “esteti origjinal”, katër vite para kësaj, kur i kishte humbur zgjedhjet nga Sali Berisha, kishte organizuar demonstrata dhe kishte bojkotuar parlamentin, gjë që kishte shkaktuar paralizë politike dhe vendin e varfëruar ballkanik e kishte hedhur edhe më shumë mbrapa.

Dhe, kur jemi te hedhja, përfundon gazeta, Rama e hedh topin në koshin që e ka vendosur në hyrje të zyrë së tij karakteristike.

Ai në rininë e tij ka qenë edhe basketbollist dhe ka luajtur madje për kombëtaren shqiptare të basketbollit. Kështu, shqiptari i gjatë 2 metra kishte mundësi të dilte ndonjëherë nga Shqipëria e mbyllur komuniste.

Sot, Edi Rama, me ftesën e presidentes së Federatës, Doris Leuthard vjen në Zvicër.  Është vizita e parë zyrtare e një kryeministri shqiptar në Zvicër pas rrëzimit të diktaturës komuniste.