Policia shton kontrollet në trafik, për 24 orë 900 gjoba

Brenda 24 orëve të fundit, numri i gjobave të shqiptuara në trafik, ka arritur deri në 900, ndërsa shumica janë për tejkalim të shpejtësisë

Policia e Kosovës raporton për shtim të numrit të aksidenteve në trafik, ndërsa si kundërpërgjigje ka shtuar numrin e patrullimeve në komunikacion. Brenda 24 orëve të fundit, numri i gjobave të shqiptuara në trafik, ka arritur deri në 900, ndërsa shumica janë për tejkalim të shpejtësisë.

Kjo rritje e aksidenteve në trafik, ka ardhur edhe si rezultat i ardhjes së mërgimtarëve në vendlindje. Me këtë rast Policia e Kosovës iu rekomandon qytetarëve që të kenë parasysh shenjat e komunikacionit, sepse ka filluar planin operativ “Sezoni verore 2015” që ndëshkon të gjithë akterën në komunikacion, përfshirë ehe këmbësorët.

Ky plan ka për qëllim ndërmarrjen e masave për nivelin e shtuar të sigurisë, ruajtjen e jetës së qytetarëve dhe pjesëmarrësve në trafik si dhe parandalimin e të gjitha llojeve të aksidenteve.

Zëdhënësi i Policisë së Kosovës, Baki Kelani thotë se Policia nuk ka për qëllim ndëshkimin e qytetarëve, duke përfshirë bashkatdhetarët, por ka për qëllim ngritjen e nivelit më të lartë të sigurisë në trafik.

Më qëllim të shtimit të sigurisë, shmangien e incidenteve dhe pritjeve të gjata nëpër kufij policia ka shtuar prezencën policore edhe në disa pika kufitare, sheshe, si dhe prezencën e policisë së trafikut nëpër disa akse rrugore, raporton RTK.

Kelani thotë së Plani operativ për sezonin veriore parasheh edhe disa objektiva të tjera siç është edhe ndalimi i përdorimit të armëve nëpër ahengje. Kelani apelon tek të gjithë pjesëmarrësit në trafik, duke përfshirë këmbësorët, që të respektojnë shenjat e komunikacionit rrugor si dhe t’u përshtaten kushteve të rrugës gjate ngasjes së automjeteve.