Policët vrasin personin që i kishte sulmuar me thikë

Policët ishin ndeshur në shkallët e ndërtesës me një person i cili i kishte sulmuar ata me thikë. Pas një të shtëne frikësimi, njëri nga policët kishte shkrepur disa plumba edhe drejt 27 vjeçarit

Në lokalitetin Bex të Kantonit Vaud në mbrëmjen e të dielës policia ka vrarë një person 27 vjeçar. Siç bën të ditur Policia Kantonale, vrasja ka ndodhur në vetëmbrojtje pasi që personi në fjalë i ka sulmuar policët me thikë, njofton Agjencia e Lajmeve e Zvicrës, sda.ch.

Policia ishte alarmuar nga një banor i një ndërtese banimi i cili ishte ankuar se dikush kishte thyer derën e një banese dhe kishte hyrë në të. Kur kishin ardhur, policët ishin ndeshur në shkallët e ndërtesës me një person i cili i kishte sulmuar ata me thikë, transmeton albinfo.ch. Pas një të shtëne frikësimi, njëri nga policët kishte shkrepur disa plumba edhe drejt 27 vjeçarit.

Përkundër përpjekjeve për ta shpëtuar përmes reanimimit nga personeli i ndihmës së shpejtë, i qëlluari me armë kishte vdekur në vendin e ngjarjes.

Polici i cili e ka qëlluar personin tashmë të vrarë, është marrë në pyetje nga prokuroria.