Pijet alkoolike të pesë kompanive nga Kosova promovohen në Gjermani

Panairi “ProWein 2023” njihet si një ndër panairet që ofron gamën më të madhe në botë të verërave, pijeve alkoolike dhe pijeve artizanale.

Mësohet se pesë kompani nga Kosova që merrem me prodhimin e pijeve alkoolike po marrin pjesë në panairin “ProWein”, i cili është hapur më 19 mars në Dyseldorf të Gjermanisë, shkruan albinfo.ch.

Pjesëmarrjen e Stone Castle Vineyards&Winery, Bodrumi i Vjetër, Illyrian, Suhareka Verari dhe Agro Vita në këtë panair e ka mbështetur Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA), me ç’rast është siguruar shtandi me numër 12D02, i cili gjendet në hapësirën ekspozuese prej 33 m2 në Hall 12.

Shtandi ku kompanitë nga Kosova po i promovojnë prodhimet e tyre të rakisë dhe verërave të llojeve të ndryshme po vizitohet nga pjesëmarrës të shumtë, të cilët po i degustojnë prodhimet e ekspozuara.

Krahas promovimit të produkteve, kompanitë nga Kosova po zhvillojnë kontakte me biznese të pranishme në panair nga shtetet e ndryshme të botës.

Njëherësh, kompanitë tona po e shfrytëzojnë praninë në panair për t’u njohur me trendët me të reja të verarisë dhe pijeve alkoolike në Evropë dhe më gjerë.

Panairi “ProWein 2023” njihet si një ndër panairet që ofron gamën më të madhe në botë të verërave, pijeve alkoolike dhe pijeve artizanale.

Panairi “ProWein” është i hapur deri më 21 mars 2023.

 

 

---