Petrit Halilaj, pjesë e panairit artistik ”Art Cologne”

Punimet e Halilajt kanë një notë të fortë biografike. Ai përdor shpesh materiale si dheu, kashta, druri, betoni, gurët apo edhe pjesë nga gërmadhat e shtëpisë së tij prindore të shkatërruar nga lufta

Në panairin e madh artistik të Kölnit “Art Cologne” që mbahet nga 16 deri 19 prill do të mblidhen artistë, mecenë, tregtarë veprash artistike nga e gjithë bota. Në këtë kuadër, në sallat e shumta të pallatit të panaireve të këtij qyteti do të hapen edhe ekspozita të shumta.

Në “Art Cologne” do të ketë ekspozitën e tij edhe artisti i ri e i njohur kosovar me qëndrim në Gjermani, Petrit Halilaj . Ekspozita e tij do të hapet më 15 prill dhe do të qëndrojë e hapur deri më 30 gusht. Një ekspozitë që është fryt i bashkëpunimit në mes të galerisë “Kunstverein Köln” dhe asaj “Bundeskunsthalle” të Bonn-it do të jetë njëkohësisht e hapur në Bonn dhe në Köln.

Punimet e Halilajt kanë një notë të fortë biografike, shkrujajnëmediet gjermane, transmeton albinfo.ch. Ai përdor shpesh materiale si dheu, kashta, druri, betoni, gurët apo edhe pjesë nga gërmadhat e shtëpisë së tij prindore të shkatërruar nga lufta.

Ndërkohë që ekspozita në Bonn është hapur që nga 6 marsi, punimet e Halilajt, pikërisht gjatë kohës së mbajtjes së “Art Cologne” do të mund të shijohen në galerinë Kunstverein në Köln.