Petkoviq tregon pse nuk e ftoi Kasamin

Kapiten në Evropian do të jetë Stephan Lichsteiner, zëvendëskapiten Valon Behrami dhe kapiteni i tretë Granit Xhaka

Mungesa e Pajtim Kasamit në listën e Zvicrës ka shkaktuar shumë reagime në shtetin helvet. Mediat e Zvicrës janë habitur me vendimin e përzgjedhësit Vladimir Petkoviq, i cili vendosi që të mos e ftojë futbollistin shqiptar, i cili ndihmoi Olympiacosin të fitojë titullin në Greqi, madje në kohë rekord.

Petkoviq ka treguar arsyet që nuk e ka ftuar Kasamin. “Kasami ka pasur pak probleme. Unë kam pasur nevojë për një lojtarë të veçantë. Kam shumë lojtarë që luajnë në pozitën e tij në mesfushë. Po ashtu kam edhe Fabian Frey dhe Denis Zakaria”, ka thënë përzgjedhësi i Zvicrës.

Petkoviq gjithashtu ka bërë të ditur se kapiten në Evropian do të jetë Stephan Lichsteiner, zëvendëskapiten Valon Behrami dhe kapiteni i tretë Granit Xhaka.

Ndeshja e parën Zvicra do ta ketë ndaj Shqipërisë më 11 qershor, derisa më pas luan me Rumaninë dhe në fund me Francën.