Kasami vëzhgohet nga Bayer Leverkusen-i

Një tjetër shqiptar mund të bëhet pjesë e bundesligës gjermane. Pas Admir Mehmedit, në afatin kalimtar Bayer Leverkusenit mund t’i bashkohet edhe shoku i tij i kombëtares zvicerane, Pajtim Kasami.

Strugani i cili aktualisht luan për Olimpiakos të Greqisë është duke u përcjellë nga ekipi gjerman, citon “Fussballinfos.ch”, mediet greke.

Mësohet se një delegacion i klubit të Leverkusenit ishte i pranishëm për të ndjekur nga afër Kasamin në ndeshjen e fundit në ligën e kampionëve të cilën Olimpiakos e fitoi kundër Dinamo Zagrebit 2-1, transmeton “albinfo.ch”.

Në fakt kjo nuk është hera e parë që Leverkusen e kërkon Kasamin. Ai kishte shprehur interesim edhe gjatë afatit të kaluar veror.

Në atë kohë mediet gjermane shkruanin se është edhe dëshira e Pajtimit që të largohet nga klubi grek ani pse ka kontratë me të deri në vitin 2018.