Petkoviç u kërkon falje tifozëve dhe i lut për mbështetje

Duke iu referuar lojës së së dielës kundër Turqisë, Petkoviç shkruan për një "ditë të re" dhe për  "lojën e shansit të fundit"

Para duelit shumë të rëndësishëm të ekipit të tij kundër Turqisë të Dielën (nga ora 18), trajneri i kombëtares zvicerane, Vladimir Petkovic u ka shkruar një letër të hapur zviceranëve, që u botua në gazetën “Schweiz am Wochenende”.

Ai e fillon letrën fillon me një kërkim ndjese për humbjen zhgënjyese kundër Italisë: “Ne donim t’ju bëjmë të lumtur me një fitore kundër Italisë pas shumë vështirësive që kemi kaluar gjatë periudhës së gjatë të pandemisë. Por kishim synuar shumë. Madje tepër shumë, si duket”.

Duke iu referuar lojës së së dielës kundër Turqisë, Petkovic shkruan për një “ditë të re” dhe për  “lojën e shansit të fundit”.

Skuadra mund të kalojë në fazën e 16-të nëse përveç taktikave të duhura, do të arrijë të rikthejë vlerat dhe virtytet e saj në fushë. Këto vlera ai i quan: solidaritet, identifikim, entuziazëm dhe respekt, transmeton albinfo.ch. Për të dielën ai kërkon pozitivitet, solidaritet dhe mbështetjen e të gjithëve.

Siç dihet, pas dy ndeshjeve të para të Evropianit, Zvicra është ndarë keq, duke barazuar kundër Uellsit dhe duke humbur “bindshëm” nga Italia. Kjo ka bërë që kombëtarja zvicerane të bëhet shënjestër e kritikave nga tifozët dhe mediat.

---