Përfundon numërimi i votave për Zgjedhjet në Kosovë

Janë numëruar më shumë se 15 mijë e 500 fletëvotime nga votimi me kusht dhe i personave me nevoja të veçanta

Ka përfunduar me dy orë vonesë procesi i numërimit të të gjitha votave për zgjedhjet parlamentare të 9 shkurtit në Qendrën e Numërimit dhe Rezultateve.

Shkak i kësaj vonese u bë një kuti që nuk mund të numërohej pas problemeve në sistem, transmeton albinfo.ch.

Zëdhënësi i Komisionit Qendror të Zgjedhjeve, Valmir Elezi, ka thënë se janë numëruar më shumë se 15 mijë e 500 fletëvotime nga votimi me kusht dhe i personave me nevoja të veçanta.

“KQZ-ja është e obliguar që të presë të paktën 48 orë para se të shpall rezultatet përfundimtare të Zgjedhjeve për Kuvendin e Kosovës. Ky nen, parasheh mundësinë që në PZAP, në një afat brenda 48 orëve nga ndodhja e shkeljes së supozuar, të paraqiten ankesat për administrimin e numërimit që është zhvilluar në Qendrën e Numërimit dhe Rezultateve. Sot, është dita e fundit kur këtu në QNR ka pasur administrim të numërimit të fletëvotimeve, andaj edhe ky afat llogaritet nga dita e sotme, 5 mars 2025, ora 21:00”, ka thënë ai.

---