Për shkak të shpejtësisë në “Rrugën e Kombit” po ndodhin aksidente me fatalitet

Në katër ditët e fundit në “Rrugën e Kombit” janë shënuar katër aksidente rrugore, me pesë të vdekur, prej tyre katër shtetas kosovarë dhe një nga Kukësi i Shqipërisë.

Të gjitha aksidentet janë shkaktuar nga shpejtësia e madhe e automjeteve, ndërsa policia vazhdon të apelojë tek vozitësit që të kryejnë pushimet dhe të kthehen ne vendlindje pa dëme, qoftë në njerëz apo edhe në automjete.

Patrullat e përbashkëta policore në territorin e Shqipërisë apelojnë te shoferët për kujdes në vozitje, pasi sipas tyre, të gjitha aksidentet janë shkaktuar nga mospërshtatja e shpejtësisë në komunikacion.

Siç njofton RTK-ja, në mëngjesin e sotëm pas një aksidenti automobilistik, ku ishin përfshirë dy automjete, në spitalin rajonal të Kukësit ka përfunduar edhe 81- vjeçari nga Gjilani Idris Hoti.

Edhe pse zonat që paraqesin rrezik në komunikacion janë të paisura me sinjalistikat e duhura, shumë pak udhëtarë i respektojnë ato.

Por aspak më e qetë nuk ka qenë situata në rrugë, as në pjesën e Kosovës. Zyrtari për informim i policisë rajonale të Prizrenit, njofton për një aksident tjetër me fatalitet në rajonin e Prizrenit. Raportohet për një person të vdekur e disa të lënduar.

Të gjitha statistikat e kësaj sezone tregojnë se numri i aksidenteve në komunikacion këtë vit është më i madh se ai i vitit të kaluar.