Për pesë muaj, 139 mijë gjoba trafiku

Gjatë pesë muajve të kaluar, Policia e Kosovës ka shqiptuar 139 mijë gjoba të trafikut, që krahasuar me vitin 2013, ka një ngritje për 21 për qind

Policia e Kosovës ka shtuar patrullimet nëpër komunikacion dhe vetëm brenda pesë muajve të fundit ka shqiptuar më shumë se 139 mijë tiketa. Ky angazhim i Policisë së Kosovë ka ardhur pas shtimit të madh të numrit të aksidenteve fatale në komunikacion.

Sipas statistikave të Policisë së Kosovës, vetëm gjatë tremujorit të parë të vitit 2014, në Kosovë kanë ndodhur 3569 aksidente, ndër to 25 aksidente me fatalitet (27 persona kanë humbur jetën); 1001 aksidente të cilësuara me lëndime; 2300 aksidente të cilësuara si “aksidente dhe dëme” ndërsa 243 aksidente “godit dhe ik”.

Policia e Kosovës për të parandaluar numrin e madh të aksidenteve të komunikacionit nëpër rrugët e Kosovës, prej datës 1 deri më 7 maj e ka organizuar fushatën “javën e sigurisë”, qëllimi i së cilës ruajtja e jetës së qytetarëve dhe ngritja e vetëdijes karshi këtij problemi.

Kjo javë u pa që ishte e efektshme, prandaj Policia vazhdoi pothuajse me të njëjtin ritëm.

Ndryshe, gjatë pesë mujorit të parë të vitit 2014, Policia e Kosovës ka shqiptuar 139 mijë gjoba të trafikut, që krahasuar me vitin 2013, numri i tiketave është ngritur për 21 për qind. Sipas policisë, gjatë të njëjtës periudhë të vitit 2013, janë shqiptuar 114 mijë  tiketa, që tregon se Policia sivjet është më efektive në trafik.