Për gazin lotsjellës dënohen 4 deputetët e Vetëvendosjes

Albin Kurti dhe Donika Kadaj Bujupi janë dënuar me dënime unike nga 1 vjet e 6 muaj burgim, derisa Albulena Haxhiu me 1 vjet e tre muaj dhe deputeti tjetër Faton Topalli me 1 vjet e 2 muaj burgim

Gjykata Themelore e Prishtinës i ka shpallur fajtorë deputetët e Lëvizjes Vetëvendosje, të akuzuar për hedhjen e gazin lotsjellës në Kuvendin e Kosovës dhe i ka dënuar me burgim me kusht.

Albin Kurti dhe Donika Kadaj Bujupi janë dënuar me dënime unike nga 1 vjet e 6 muaj burgim, derisa Albulena Haxhiu me 1 vjet e tre muaj dhe deputeti tjetër Faton Topalli me 1 vjet e 2 muaj burgim.

Dënimet e tyre nuk do të fuqizohen, përveç nëse të njëjtit kryejnë ndonjë vepër penale brenda periudhës dyvjeçare.

Kryetari i trupit gjykues, Beqir Kalludra, ka thënë se vendimi ishte unanim për shpalljen e tyre fajtorë. Por, avokati i Faton Topallit, Haxhi Millaku, ka paralajmëruar ankesë në Gjykatën e Apelit.

Kryetari i dorëhequr i Lëvizjes Vetëvendosje, Visar Ymeri, ka reaguar ndaj dënimit të deputetëve të kësaj partie, Albin Kurtit, Albulena Haxhiut, Donika Kadaj-Bujupit dhe Faton Topallit për hedhje të gazit lotsjellës në Kuvendin e Kosovës.

Në një postim në Facebook, Ymeri ka shkruar se ky aktgjykim është akti më hipokrit që ka prodhuar ndonjë institucion vendor. “Albini, Albulena, Donika dhe Fatoni janë përfaqësues të popullit, në emër të të cilit sot u dënuan. Aktgjykimi si i tillë është akti më hipokrit që ka prodhuar ndonjë institucion vendor deri më tani dhe si i tillë është mjeti i fundit i persekutimit të kundërshtarëve politikë”, ka shkruar Ymeri.

Për dënimin ka reaguar edhe kreu i Prishtinës, Shpend Ahmeti, i cili ka thënë se është ndër dënimet më të padrejta të historikut të shkurtë të Gjyqësorit të shtetit tonë.