Për 2 muaj mund të infektohen me ‘Omicron’ më shumë se gjysma e evropianëve

Ky është paralajmërimi që vjen nga Organizata Botërore e Shëndetësisë.

Më shumë se gjysma e evropianëve mund të infektohen me variantin Omicron gjatë dy muajve të ardhshëm, nëse përhapja do të vijojë me ritmet e tanishme.

Dejtori rajonal i OBSH-së për Europën tha se varianti përfaqësonte një “valë të re të furishme nga perëndimi në lindje” që po përfshinte kontinentin.

“50 nga 53 vendet e rajonit të Europës dhe Azisë Qendrore kanë raportuar raste me Omicron. Ai po bëhet shpejt dominues në Europën Perëndimore dhe po përhapet edhe në vendet e Ballkanit. Në këto nivele, Instituti i Vlerësimeve Statistikore parashikon se më shumë se 50 për qind e popullsisë në rajon do të infektohen me Covid-19, nga 6 deri në 8 javët e ardhshme”, tha Hans Kluge në një konferencë për media, transmeton Albinfo.ch.

Sipas zyrtarit të OBSH-së, 26 nga vendet e rajonit kanë raportuar se mbi 1 për qind e popullsisë së tyre po infektoheshin çdo javë dhe nga fillimi i vitit deri më 10 janar, janë regjistruar më shumë se 7 milionë raste të reja.

“Varianti Omicron përfaqëson një valë të re nga perëndimi në lindje që po përfshin rajonin. Reagimi i çdo vendi duhet të mbështetet te situata epidemiologjike, resurset në dispozicion, vaksinimi dhe konteksti socio-ekonomik. Rajoni ka raportuar mbi 7 milionë raste të reja në javën e parë të 2022”, shtoi Kluge.

Sipas tij, varianti është më i transmetueshëm dhe mund të infektojë edhe ata që e kanë kaluar sëmundjen apo që janë vaksinuar.

 

---