Për 10 muaj, 9.3 milionë udhëtarë në aeroportin “Nëna Terezë” të Tiranës

Nëse bëjmë një llogaritje të thjeshtë, mund të themi se në çdo muaj të këtij viti kanë udhëtuar në linja ajrore mesatarisht rreth 925 mijë pasagjerë

Referuar të dhënave në faqen zyrtare të Aeroportit Ndërkombëtar “Nënë Tereza”, përgjatë periudhës Janar-Tetor të këtij viti kanë udhëtuar me linja ajrore rreth 9.3 milionë pasagjerë, me një rritje vjetore prej 54%.

Vetëm në tetor numërohen rreth 936 mijë, me një rritje prej 48%. Këto shifra mbështesin faktin se turizmi në Shqipëri ka përjetuar një rritje të vazhdueshme muaj pas muaji, shkruan Scan, transmeton albinfo.ch.

Nëse bëjmë një llogaritje të thjeshtë, mund të themi se në çdo muaj të këtij viti kanë udhëtuar në linja ajrore mesatarisht rreth 925 mijë pasagjerë.

Por çfarë të dhënat për numrin e fluturimeve?

“Scan Intel” ka marrë në analizë të dhënat e EUROSTAT për të parë se si varion rritja e numrit të fluturimeve në Shqipëri, rajon dhe Evropë.

Numrat flasin për rreth 58 mijë fluturime komerciale përgjatë dhjetë muajve të vitit aktual në vendin tonë. Shifrat e “Agjencisë Europiane të Statistikave” mbi numrin e fluturimeve komerciale sipas vendeve të Evropës tregojnë se Shqipëria është e dyta që ka shënuar rritjen më të lartë të këtij treguesi për dhjetëmujorin, krahasuar me një vit më parë.

Të dhënat bëjnë me dije se numri i fluturimeve në vendin tonë është rritur me rreth 46.6%, krahasuar me të njëjtën periudhë të vitit 2023. Shqipëria, bashkë me Islandën, kryeson me rritjen më të madhe, ndërkohë që numri i fluturimeve në Bashkimin Evropian është rritur me 6%, krahasuar me vitin 2023.

Vende të rajonit po ashtu raportojnë rritje të numrit të fluturimeve, por pa mundur të tejkalojnë Shqipërinë. Sipas shifrave, rritja në Malin e Zi vlerësohet me 15.6%, në Bosnjë e Hercegovinë me 9.2%, në Maqedoninë e Veriut me 10.6% dhe në Serbi me 9.1%.

 

---