Për 1 orë e gjysmë, Diaspora kontribuon me 35 mijë euro

Thirrjes së kryeministrit në detyrë të Kosovës, Albin Kurti, i është përgjigjur pozitivisht diaspora

Diaspora gjithmonë ka dhënë kontribut të madh në Kosovë. Ajo ka kontribuar në forma të ndryshme dhe në sfera të ndryshme të jetës, madje, remitencat llogariten të jenë mbi 1.5 miliardë euro në vit.

Ditë më parë, kryeministri në detyrë i Kosovës, Albin Kurti, ka kërkuar ndihmë, pas gjendjes me pandeminë Covid-19 në Kosovë, shkruan albinfo.ch.

Ministri në detyrë i Financave dhe i Transfereve i Kosovës, Besnik Bislimi, ka thënë që vetëm sot për 1 orë e gjysmë diaspora në fondin e krijuar nga Qeveria ka derdhur 35 mijë euro.

“Diaspora po na ndihmon tepër shumë. 35 mijë euro për 1 orë e gjysmë janë derdhur vetëm sot nga diaspora. Problemi është që po marrin kohë deri në tri ditë për t’u derdhur në fond”, ka thënë Bislimi.

Edhe pse kishte reagime të ndryshme, Diaspora vazhdon të ndihmojë në Kosovë.

---