Pas papunësisë, korrupsioni sfidë për kosovarët

Rezultatet e hulumtimit të opinionit me qytetarët që ka zhvilluar UNDP, tregojnë se korrupsioni është problemi më i rëndësishëm në Kosovë, duke u renditur pas papunësisë

Korrupsioni vazhdon të renditet si një nga problemet më të rëndësishme me të cilin ballafaqohet Kosova. Sipas një ankete që ka përgatitur UNDP, 18 për qind e qytetarëve të anketuar janë të mendimit se korrupsioni është problemi më i rëndësishëm në Kosovë, duke u renditur pas papunësisë si çështje më problematike me 39 për qind e të anketuarve.

Sipas shumicës së të anketuarve, 58 për qind, niveli i korrupsionit në Kosovë nuk ka ndryshuar gjatë 12 muajve të fundit. Nga ana tjetër, 31 për qind e tyre besojnë se korrupsioni është rritur, në krahasim me 12 për qind që mendojnë se niveli i korrupsionit është ulur.

Sipas UNDP-së, në kuptim të perceptimit të korrupsionit në mesin e punonjësve të sektorit publik, shumica e zyrtarëve në të dy nivelet e qeverisjes janë të mendimit se shërbimi civil i Kosovës është i mbushur me “nepotizëm, favorizime dhe patronazh, ushtrim të ndikimit dhe përvetësim, vjedhje e mashtrime”.

“Nëpunësit publik që punojnë në institucionet e nivelit komunal janë më të prirë të besojnë se “ryshfeti” ekziston në të gjithë shërbimin civil në Kosovë (80.8 për qind), në krahasim me zyrtarët e institucioneve të nivelit qendror (66.3 për qind)”, thuhet në anketën e UNDP-së.

Pavarësisht nivelit të lartë të perceptimit të korrupsionit, ende vetëm 28.2 për qind nga zyrtarët e institucioneve të nivelit qendror dhe 18.3 për qind të zyrtarëve nga institucionet e nivelit komunal, sipas UNDP-së, treguan se kanë raportuar korrupsionin kur ata kanë qenë dëshmitarë.

Ndryshe, në anketë kanë marrë pjesë 839 shqiptar të Kosovës, 233 serb të Kosovës dhe 228 anketa janë zhvilluar me minoritetet tjera të Kosovës.