Partia e gjedheve*

Pyetjes: Sa refugjatë mund t’i pranojë Zvicra në vit? Njëqind, përgjigjet Toni Brunner. Njëqind refugjatë në vit. Këtë vërtet duhet mbajtur mend!

Keystone

Anketat për zgjedhjet e tetorit flasin për një fitore të sërishme SVP-së. Kush ka senzorë për matjen e disponimit në vend, duhet fatkeqësisht ta pranojë se parashikimet do të përmbushen. Fatkeqësisht po. Nuk duhet demonizuar këtë parti që të ndiesh një bezdi të lehtë për të. Për këtë s’ke nevojë të lexosh as komentet nënçmuese të adhuruesve të saj, të cilat ata gjatë tërë ditëve të lume i nxjerrin nga vetja e tyre në mediet sociale. Mjafton që ta dëgjosh njëherë me vëmendje shefin e saj.

Javën e kaluar, Toni Brunner, iu përgjigj disa pyetjeve të gazetës “Die Zeit”, të cilave ai duhej t’ju përgjigjej me numra. Për shembull, për sa vendime politike jeni penduar deri tash? Zero, përgjigjet Brunner. Pyetje: me sa refugjatë keni folur këtë vit? Dy. Pyetje: Sa refugjatë mund t’i pranojë Zvicra në vit? Njëqind, përgjigjet Toni Brunner.

Njëqind refugjatë në vit. Këtë vërtet duhet mbajtur mend. Në një komunikim elektronik të drejtpërdrejtë të “Tagesanzeiger”, Brunneri shkon edhe më larg. Në pyetjen se a ka dhuruar ndonjëherë për “Glückskette”, Bruner-i përgjigjet me jo, sepse atij i shkuaka në nerva “makineria e organizuar e mëshirimit”. Vërtet shtangesh nga kjo mendësi e këtij realiteti. Sot kur tërë Evropa po dënes nga vala historike e refugjatëve, kur po bëhen përpjekje që dorëpërdorë të shmanget një katastrofë – e për zgjidhje afatgjatë as që mund të flitet – Toni Brunner, shefi i partisë më të madhe të Zvicres, sheh këtu vetëm një makineri mëshirimi! Dhe kapaciteti ynë i pranimit: 100 në vit!

Sigurisht se asnjë vend evropian nuk mund të pranojë refugjatë pakufi dhe me një tempo të çfarëdoshme. Por njëqind? A e keni përnjëmend, Toni Brunner?

Shumë gjatë nuk ka menduar ai këtu. Për shembull se çka do të thoshte kjo për të ardhmen e Zvicrës në Evropë. Por ndoshta ai as që mundur të mendojë aq larg, sepse numrat mbi 100 i kapërcejnë kapacitetet e tij intelektuale. Apo, ashtu sikurse edhe shefi i qeverisë hungareze, Viktor Orban, edhe ai ushqen shpresën e ruajtjes së Zvicrës me tela gjemborë dhe me armatë? Ndoshta fshatari këtë edhe e ka planifikuar me të. Ndoshta ai mendon se ne jemi gjedhe që duhet ruajtur duke u vënë këmbana në qafë dhe duke i rrethuar me tela?! Apo ndoshta është edhe e kundërta?

Ndoshta jo ne, por ai është gjedhi?!

8*Michèle Binswanger, „Berner Zeitung“)

Përkthimi. Nexhmedin Gerguri