Parlamenti zviceran rrezikon ta shfuqizojë pagën minimale në Gjenevë

Parlamenti zviceran ka votuar këtë javë në favor të dhënies së përparësisë marrëveshjeve kolektive të punës (CLA) mbi pagat minimale të përcaktuara nga kantonet, një vendim që mund të çojë në shfuqizimin e pagës minimale më të lartë në Zvicër asaj të Gjenevës.

Kantoni i Gjenevës ka vendosur një pagë minimale prej 25 euro në orë, ndërsa kantoni i Neuchâtel 21 euro. Të dyja janë miratuar më parë përmes referendumeve popullore. Megjithatë, me vendimin e Këshillit Kombëtar, ekziston rreziku që këto paga të hiqen nëse edhe Këshilli i Shteteve mbështet nismën. Në një hap të mëtejshëm, çështja mund të dërgohet në votim kombëtar, transmeton albinfo.ch.

Zvicra, ndryshe nga shumica e vendeve evropiane, nuk ka një pagë minimale kombëtare. Në vend të saj, paga dhe kushtet e punës rregullohen përmes CLA-ve, të cilat përfshijnë jo vetëm pagat, por edhe pushimet, pensionet dhe mbrojtjen nga pushimi nga puna.

Vendimi ka ngjallur reagime të ashpra nga sindikatat, të cilat e kanë cilësuar si një “sulm ndaj demokracisë”, duke thënë se ai e bën të pavlefshme vullnetin popullor. Nga ana tjetër, grupet e biznesit e kanë përshëndetur vendimin, duke e konsideruar si një hap në drejtim të forcimit të modelit të partneritetit social zviceran.