Parlamenti kundër ashpërsimit të masave për duhanin

Iniciativa për ashpërsimin e masave ndaj duhanpirjes, sipas deputetëve, është tepër radikale me kërkesat e saj

Dhoma e kantoneve (senati) e Parlamentit Federal të Zvicrës ka votuar kundër ashpërsimit të mëtejmë të ndalimit ekzistues të konsumimit të duhanit në restorante dhe në bare. Një qëndrim të tillë e ka mbrojtur më parë edhe dhoma nacionale.

Të dy dhomat i rekomandojnë popullit një Jo ndaj iniciativës popullore “Mbrojtje nga tymosja pasive e duhanit”, të iniciuar nga Lungenliga.

Një numër deputetësh duke arsyetuar votimin e tyre kanë thënë se nuk dëshirojnë që edhe njëherë të nxisin nga fillimi debatin për ndalimin e duhanit. Veç kësaj, iniciativa, sipas tyre është tepër radikale me kërkesat e saj.

Njëra ndër kërkesat e iniciativës është që të vetmet hapësira ku mund të pihet duhani të mbeten ato pa shërbyes. Po ashtu sipas iniciativës, nuk do të lejoheshin më as lokalet e vogla për pirje të duhanit si dhe do të ndalohej tymosja e duhanit në të gjitha vendet e punës.