Parlamenti i Kosovës, rezolutë në mbrojtje të sovranitetit

Rezoluta e miratuar e mbështet të drejtën kushtetuese të institucioneve për ushtrimin e kontrollit të plotë në territorin e Kosovës

Të enjten në seancën e jashtëzakonshme lidhur me gjendjen në veri, Parlamenti i Kosovës ka miratuar Rezolutën në mbështetje të Qeverisë së Kosovës për vënien e rendit dhe ligjit në tërë territorin e Kosovës. Me 89 vota për dhe 9 kundër, parlamentarët i bëjnë thirrje bashkësisë ndërkombëtare që ta ndihmojë Kosovën në këtë proces.

Rezoluta e miratuar në Kuvendin e Kosovës e mbështet të drejtën kushtetuese të institucioneve për ushtrimin e kontrollit të plotë në territorin e Kosovës dhe kërkon që të respektohen masat e reciprocitetit me Serbinë të gjitha pikat doganore.

Kuvendi përmes kësaj Rezolute fton bashkësinë ndërkombëtare për të përkrahur institucionet e vendit në vendosjen e rendit dhe ligjit në tërë territorin e Kosovës, ndërsa u bënë thirrje të gjithë qytetarëve pa asnjë dallim që ta ruajnë qetësinë, rendin kushtetues dhe sundimin e ligjit.

Po ashtu, deputetët e Kuvendit të Kosovës kërkuan nga Qeveria e Kosovës që të vazhdojnë angazhimin për vendosjen e autoritetit kushtetues në pikën 1 dhe 31, si dhe ndërmarrjen e veprimeve tjera për shtrirjen dhe ushtrimin e sovranitetit në tërë territorin e vendit.

Ndryshe, rezoluta ishte e përkrahur nga të gjitha Grupet parlamentare pavarësisht se disa pika të propozuara nga Vetëvendosje nuk janë përfshirë në Rezolutë. Njëra ndër rekomandimet e Vetëvendosjes ishte që presidentja e vendit të shpallë gjendjen e jashtëzakonshme.