Parlamenti Evropian kritikoi sërish zgjedhjet në Kosovë

Komiteti për politikë të jashtme i Parlamentit Evropian, në mbledhjen e mbajtur mbrëmë në Strasburg, ka vlerësuar se në zgjedhjet e dhjetorit dhe në rivotimet e janarit në Kosovë, janë vërejtur përmirësime teknike, por ka pasur edhe lëshime serioze dhe mosrespektim të rregullave zgjedhore.

Gjatë debatit të eurodeputetëve është dhënë edhe vlerësimi se zgjedhjet në Kosovë nuk ishin sipas standardeve ndërkombëtare.

Shefja e delegacionit vëzhgues të zgjedhjeve në Kosovë, Urlike Lunacek, ka tërhequr vërejtjen për mashtrime gjatë numërimit të votave dhe kërcënime, raportoi Evropa e Lirë. Ajo ka përmendur se edhe përfaqësues ndërkombëtarë në Kosovë, po kërkojnë që të formohet qeveria e “duarve të pastra”, që do të thotë pa personat, që janë nën hetime. Lunacek ka thënë se “cilat do parti që të vijnë në qeveri, në Kosovë duhet të ketë ndryshime”.

Anëtari i Parlamentit Evropian, Eduard Kukan, ka thënë se “përshtypja e përgjithshme është e kënaqshme, por në shumë vendvotime ka pasur kurdisje të qarta dhe falsifikime të procesit zgjedhor”. Sipas tij, “procesi i këtillë zgjedhor në Kosovë e frenon përparimin e përgjithshëm dhe dialogun e Prishtinës me Beogradin”.

Ndërsa europarlamentari Jelko Kacin ka thënë se, megjithë vështirësitë, “zgjedhjet e përsëritura në tri komuna kanë dhënë rezultate, pasi kryeministri në dorëheqje dhe partia e tij i kanë humbur dy deputetë”. Kacin ka vlerësuar pozitivisht pjesëmarrjen e serbëve të Kosovë në zgjedhje.