Paralajmërohen fluturime të reja drejt Vienës për riatdhesimin e shqiptarëve

Harta e fluturimeve është zgjeruar në Spanjë, Rumani dhe Vienë.

Është bërë e ditur nga ministrja e Infrastrukturës së Shqipërisë, Belinda Balluku, ka zbuluar shtetet ku do të kryhen fluturimet e tjera të riatdhesimit javën e ardhshme, përcjell albinfo.ch.

Në një lidhje direkte për emisionin “Opinion” në Tv Klan, Balluku deklaroi se harta është zgjeruar në Spanjë, Rumani dhe Vienë.

Në këto shtete ka pasur kërkesa nga qytetarë shqiptarë që kanë mbetur të bllokuar për shkak të mbylljes së kufijve.

“Parisi është destinacion, i cili i ka të gjitha vendet e rezervuara. Londra po përgatitet për fluturimin e dytë pasi fluturimi i parë është përfunduar.

Harta është zgjeruar, duke iu referuar kërkesave, kemi identifikuar që Madridi është një tjetër destinacion që do të kryhet gjatë javës së ardhshme. Është futur edhe Bukureshti.

Kërkesa ka qenë e madhe dhe ambasadori ynë atje na ka kontaktuar dhe kemi rënë dakord që do kryhet një fluturim. Si dhe Viena, pasi është leja e marrë tashmë dhe janë kryer të gjitha formalitetet. Do të kryhet më datë 27, ditë e hënë”, u shpreh ministrja Belinda Balluku. /Albinfo.ch

---