Pacolli: Duam menjëherë liberalizimin e vizave

Ministri i Punëve të Jashtme, Behgjet Pacolli, në takimin me homologun e tij hungarez, Peter Szijarto, i kërkoi atij që procedura e dhënies së vizave të lehtësohet që tani edhe në nivel dypalësh.

“Ne duam menjëherë liberalizimin e vizave, sepse ne nuk duam që të rinjtë tanë, njerëzit e biznesit, të ndihen të izoluar, të diskriminuar në nivel evropian”, ka thënë Pacolli, përcjell albinfo.ch.

Nga ana e tij, Szijarto e quajti shumë të drejtë këtë shqetësim dhe e njohu Pacollin me një rast të ndërhyrjes së tij për të shkurtuar afatet e takimeve për viza në ambasadën hungareze në Prishtinë dhe tha se do të konsideronte çdo hapësirë për të lehtësuar procedurat.

Pacolli e vlerësoi si shumë të rëndësishme këtë mbështetje dhe kërkoi praninë e investitorëve hungarezë në zhvillimin e Kosovës.