Ousmane Dembélé shpallet lojtari më i mirë i botës për vitin 2025 nga FIFA

Ousmane Dembélé është shpallur lojtari më i mirë i vitit 2025 nga FIFA, duke fituar çmimin prestigjioz “The Best” pas një gare të fortë me talentin spanjoll Lamine Yamal dhe yllin francez Kylian Mbappé.

Sulmuesi i Paris Saint-Germain po kurorëzon një vit të jashtëzakonshëm, pasi më herët kishte fituar edhe Topin e Artë, falë paraqitjeve brilante si në nivel klubi ashtu edhe me përfaqësuesen franceze.

Sezoni i kaluar ishte historik për PSG-në, e cila arriti tripletën, duke përfshirë edhe triumfin e parë ndonjëherë në Ligën e Kampionëve. Dembélé ishte një nga figurat kyçe të këtij suksesi, duke dhënë kontribut vendimtar në rrugëtimin evropian të skuadrës parisiene.

Përveç kësaj, PSG u shpall fituese e Superkupës së UEFA-s, ndërsa në Kupën e Botës për Klube u rendit në vendin e dytë. Me kombëtaren franceze, Dembélé e mbylli vitin duke zënë vendin e tretë në Ligën e Kombeve.

Gjatë fjalimit në ceremoninë “The Best”, futbollisti francez u shpreh i emocionuar:

“Dua të falënderoj të gjithë bashkëlojtarët e mi. Çdo sukses vjen nga puna e madhe dhe përkushtimi. Faleminderit familjes sime dhe klubit për një vit të paharrueshëm. Faleminderit edhe Gianni Infantinos për urimin në ditëlindje. Shpresoj të jem sërish këtu vitin e ardhshëm.”

Me fitimin e Topit të Artë 2025 dhe çmimit “The Best”, Ousmane Dembélé e mbyll vitin si një nga futbollistët më të suksesshëm dhe më dominues në skenën botërore.