Osmani, Kurti dhe Gërvalla bëjnë homazhe tek shtatorja e Zahir Pajazitit

Sot, presidentja Vjosa Osmani, kryeministri Albin Kurti dhe zëvendëskryeministrja Donika Gërvalla po bëjnë homazhe te shtatorja e heroit, Zahir Pajaziti, përcjell albinfo.ch.

Kujtojmë se më 31 janar të vitit 1997 ndodhi njëra nga betejat e para madhore të pjesëtarëve të Ushtrisë Çlirimtare të Kosovës. Tre strategët, Zahir Pajaziti, Hakif Zejnullahu dhe Edmond Hoxha, ishin duke udhëtuar nga Prishtina në drejtim të Vushtrrisë, derisa grupi i tyre zbulohet nga sigurimi serb, të cilët kishin vënë pritë në fshatin Pestovë, ku të tre bien heroikisht në luftë me ta.

Aktivitetet ushtarake Zahir Pajaziti i filloi gjatë viteve 90-ta. Në rrethanat e krijuara gjatë grevave të përgjithshme në Kosovë të mbajtura më 3 shator të vitit 1990, Zahiri dhe aktivistët e tjerë filluan të punojnë për ngritjen e një rrjeti sigurimi në Kosovë.