Osmani: Incidentet në veri, të orkestruara nga strukturat ilegale

Presidentja e Kosovës, Vjosa Osmani, ka reaguar për incidentet e fundit në veri të Kosovës, ku është raportuar për djegien e disa makinave të pronarëve serbë, të cilat kanë qenë të regjistruara me targa RKS.

Presidentja e Kosovës, Vjosa Osmani, ka reaguar për incidentet e fundit në veri të Kosovës, ku është raportuar për djegien e disa makinave të pronarëve serbë, të cilat kanë qenë të regjistruara me targa RKS.

Osmani ka thënë se ato incidente janë të orkestruara nga struktura ilegale, të mbështetura nga Beogradi, të cilat kanë për qëllim frikësimin dhe kanosjen e popullatës lokale serbe, transmeton Albinfo.ch.

“Kosova do të vazhdojë të jetë plotësisht e koordinuar me aleatët ndërkombëtarë për të vazhduar përpjekjet për paqe, siguri dhe stabilitet të qëndrueshëm, ndërsa është e përkushtuar për zbatimin e rendit dhe ligjit në gjithë territorin e Republikës”, ka thënë ajo.

Osmani i ka bërë këto deklarata në një takim me të dërguarit e posaçëm të Gjermanisë dhe Austrisë për Ballkanin Perëndimor, Manuel Sarrazin dhe Johannes Eigner.

Sipas Presidencës, në takim palët kanë biseduar edhe dakordimin e arritur mes Kosovës dhe Serbisë për Marrëveshjen e normalizimit të marrëdhënieve mes dy vendeve, më 27 shkurt në Bruksel, si dhe për aneksin e zbatimit të Marrëveshjes, më 18 mars në Ohër.

Për të diskutuar rezultatet e këtyre takimeve, më 4 prill në Bruksel do të takohen kryenegociatorët e Kosovës dhe Serbisë, Besnik Bislimi dhe Petar Petkoviç.

Ministria e Punëve të Brendshme e Kosovës nuk ka treguar se sa makina me targa të tilla janë riregjistruar në RKS. Vlerësohet se në veriun e Kosovës janë rreth 10.000 makina me targa të lëshuara nga Serbia./Albinfo.ch

---