Organizata zvicerane për ndihmë refugjatëve, kundër favorizimit të ukrainasve

Trajtimi i pabarabartë në mes të refugjatëve nga Ukraina dhe të tjerëve, të afrdhur nga zonat me luftime, nuk mund të shpjegohet, kritikon SFH

Organizata kryesore zvicerane që mbron refugjatët Schweizer Flüchtlingshilfe (SFH) kërkon që leja F për pranimin e përkohshëm të refugjatëve të zëvendësohet me status pozitiv të mbrojtjes, pra, me njohje të azilit.

Statusi i ri i mbrojtjes duhet të shprehë qartë dhe pozitivisht dhënien e mbrojtjes dhe nuk duhet të përmbajë asnjë cilësim të natyrës “së përkohshme”, transmeton albinfo.ch. Prandaj SFH propozon që emërtimi i statusit të ri të jetë “mbrojtje humanitare”.

Statusi i ri duhet t’u mundësojë personave të prekur të aplikojnë për leje të rregullt qëndrimi (Vizë B) pas pesë vitesh në Zvicër, shkruan srf.ch. Për më tepër, mbështetja shtetërore, gjegjësisht ndihma sociale, duhet të jetë e njëjtë për këta njerëz si për refugjatët me status të njohur.

Ngjashëm me refugjatët ukrainas që sot janë të vetmit që gëzojnë statusin “S”, ata që pranohen përkohësisht vijnë shpesh nga vendet me gjendje të luftës. Prandaj, trajtimi i pabarabartë për këtë arsye nuk mund të shpjegohet, kritikon Schweizer Flüchtlingshilfe.

Përveç kësaj, në këtë status duhet të përfshihen edhe liria e udhëtimit dhe mundësia e bashkimit familjar si dhe e drejta për të ndërruar kantonin, përcjell albinfo.ch. Ndihma sociale duhet gjithashtu të jepet në të njëjtën masë si për refugjatët me status të pranuar.

---