Opsione të shumta për Zhegrovën

(KEYSTONE/Alessandro della Valle)

Ylli i ri kosovar e preferon qëndrimin në Bazel, por për të ka interesime edhe nga Anglia, Franca, Italia e nga Gjermania.

E ardhmja e Edon Zhegrovës ka mbetur ende pezull.

Ylli i ri kosovar aktualisht është i huazuar në Bazel, por klubi zviceran nuk duket i interesuar për ta blerë kartonin e tij.

Sidoqoftë, 21-vjeçari pritet të rikthehet përkohësisht në Genk gjatë kësaj vere.

Mediumi “DTT-Net” njofton se dëshirë e përfaqësuesit kosovar është qëndrimi në Bazel, përcjell Gazeta Express.

Por, edhe nëse nuk ndodh kjo, Zhegrova nuk ka arsye të brengoset.

Kjo pasi futbollisti ofensiv ka plot opsione të tjera në dispozicion.

Mediat franceze shkruajnë se interesim për futbollistin e krahut kanë shfaqur katër klube franceze: Olympique Marseille, Olympique Lyon, Lille e Nantes.

Por, ish-futbollistin e Prishtinës e pëlqejnë edhe klubet angleze, Chelsea e Wolverhampton.

Po ashtu, flitet se për Zhegrovën interesim kanë shfaqur edhe klubet gjermane dhe ato italiane.

Menaxheri i futbollistit, Marc Van Osselaer, ka thënë se kampionati francez momentalisht do të ishte ideal për zhvillimin e Edonit.