OBSH: Misioni hetues në Kinë për të kërkuar fakte, jo fajtorë

OBSH siguroi se misioni i saj për të hetuar origjinën e pandemisë, që pritet këtë javë në Kinë, nuk kishte për qëllim të gjente fajtorë, por fakte.

“Bëhet fjalë për të kuptuar origjinën e pandemisë dhe jo dikë për të fajësuar”, tha kreu i OBSH-së për Urgjencat Shëndetësore Michael Ryan, raporton AFP, përcjell Albinfo.ch.

“Është një çështje për gjetjen e përgjigjeve shkencore për takimin ballë për ballë midis njeriut dhe kafshës. Është një domosdoshmëri absolute”, shtoi ai.

Pekini njoftoi se hetuesit e shumëpritur të OBSH-së, të ngarkuar të kërkojnë origjinën e COVID-19, do të mbërrijnë në Kinë këtë javë, një vit pasi u raportua vdekja e parë në vend.

Vizita e 10 ekspertëve të OBSH-së është tepër e ndjeshme për regjimin kinez, e shqetësuar për të shmangur çdo përgjegjësi për epideminë që ka vrarë më shumë se 1,9 milionë njerëz në të gjithë botën, ndërsa është çrrënjosur në Kinë.