OBSH-ja do të testojë tri ilaçe ekzistuese për përdorim kundër COVID-19

Organizata Botërore e Shëndetësisë ka njoftuar të mërkurën se së shpejti do ta nisë testimin e tri ilaçeve ekzistuese për të parë nëse ato mund t’i ndihmojnë pacientët që vuajnë nga COVID-19.

Tri ilaçet, sipas OBSH-së, mund të miratohen pas përfundimit të fazës së ardhshme të hulumtimit global për identifikimin e trajtimeve potenciale ndaj koronavirusit.

Ilaçet që do të testohen janë zgjedhur nga një panel i pavarur, bazuar në gjasat e tyre për t’i parandaluar vdekjet mes personave të hospitalizuar shkaku i infeksionit të rëndë me virus.

Në testim do të përfshihen artesunati, një ilaç ky kundër malaries, bari kundër kancerit imatinib dhe infliximabi, i cili aktualisht përdoret te personat me sëmundje të sistemit imunitar.