Numri më i ri i magazinës albinfo.ch në duar të lexuesve

Në këtë numër do të lexoni po ashtu një intervistë ekskluzive me shqiptaro-zviceranen, Eleonora Berisha, e cila sjell përvojat nga misioni me Swisscoy në Kosovë

Këto ditë ka dalë nga shtypi dhe tashmë ndodhet në duart e lexuesve numri më i ri, i 21-të i magazinës albinfo.ch

Ky numër ka dy tërësi kryesore temash: shqiptarët në transportin publik dhe shëndetësia. Në të parën prezantohen shoferë shqiptarë tramvajesh e trolejbusësh dhe makinistë trenash etj. Në këtë dosje mund të lexoni për numrin e madh të shoferëve shqiptarë në Ndërmarrjen e Transportit Publik të Cyrihut, si rast kurioz. Ndërsa Azemine Shaqiri, shoferja e autobusit “fizarmonikë”, të gjatë 25 metra rrëfen se si e ka “pushtuar” terrenin e rezervuar për meshkuj. Portreti i radhës është ai i Afrim Bajramit, shqiptarit mbase të vetëm që e bën punën e lokomotivistit në Zvicër.

Në bllokun për shëndetësinë, bëhet fjalë për përvojat e bashkatdhetarëve tanë me trajtimin mjekësor që u bëhet në Kosovë dhe krahasimin me praktikën zvicerane.

Në këtë numër do të lexoni po ashtu një intervistë ekskluzive me shqiptaro-zviceranen, Eleonora Berisha, e cila sjell përvojat nga misioni me Swisscoy në Kosovë.

Revista albinfo.ch për muajin nëntor përmban edhe materiale tjera, por nuk do të mungojnë as  ato nga sfera e argëtimit, artit apo sportit.

Albinfo.ch, sikurse edhe deri tash, mund të gjendet në të gjitha mjediset shqiptare në Zvicër. Ndërsa ato apo ata që duan ta kenë në shtëpi, mund ta bëjnë porosinë e saj.