Numri ditor i viktimave nga COVID-19 në Gjermani në rritje të konsiderueshme

Keystone - @acalmelor

Gjermania regjistroi sot 590 vdekje nga COVID-19, numri më i rëndë ditor që nga fillimi i pandemisë.

Sipas agjencisë gjermane të kontrollit të sëmundjeve, vendi ka regjistruar gjithashtu 20 815 infektime të reja në 24 orët e fundit, kundrejt 14 054 rasteve të reja të konfirmuara një ditë më parë.

Pavarësisht nga bllokimi i pjesshëm që filloi më 2 nëntor, Gjermania nuk ka arritur të përmbushë qëllimin e saj për të ulur numrin e infektimeve të reja në më pak se 50 raste për 100 000 banorë, për një periudhë shtatëditore.

“Shkalla e infeksionit është tani 149 raste për 100 000 banorë, gati tri herë sa kufiri i vendosur nga qeveria”, tha Instituti Robert Koch (RKI).

Instituti paralajmëroi se infektimet e reja janë rritur te të moshuarit javët e fundit dhe kanë çuar në një rritje të numrit të rasteve të rënda dhe vdekjeve.

Sipas shifrave të fundit, 4 257 pacientë me COVID janë aktualisht duke u trajtuar në njësitë e kujdesit intensiv (ICU).

Gjermania është vendi i pestë në Europë për nga numri i infektimeve me koronavirusin e ri, pas Francës, Spanjës, Britanisë së Madhe dhe Italisë