Norvegjia, e gatshme ta vazhdojë mbështetjen për Kosovën

Ministri i Financave, Punës dhe Transfereve, Hekuran Murati, ka pritur sot në takim njohës ambasadorin e Norvegjisë në Kosovë, Jens Erik Grondahl, ku është diskutuar për bashkëpunimin ndërshtetëror dhe për gjendjen emergjente shëndetësore me pandeminë COVID-19.

Murati gjatë këtij takimi e ka falënderuar ambasadorin norvegjez për projektet të cilat i ka financuar shteti i tij në Kosovë, me theks të veçantë projektet në sistemin e drejtësisë dhe shoqëri civile.

Në komunikatën e dërguar për media thuhet se në takim u diskutua për gatishmërinë dhe masat që do të ndërmarrë qeveria “Kurti” për t’i ofruar mbështetje financiare sektorit privat, i ndikuar drejtpërdrejt nga vendimi i Qeverisë, si dhe për planin zhvillimor dhe legjislativ të Qeverisë, me theks të veçantë formalizimin e ekonomisë, luftimin e korrupsionit, si dhe zbatimin e ligjit.

“Ndërsa ambasadori norvegjez, Jens Erik Grondahl, shprehu gatishmërinë për rritjen e bashkëpunimit ndërmjet dy vendeve dhe theksoi se mbështetja e shtetit norvegjez do të vazhdojë edhe në të ardhmen. Ai gjithashtu theksoi se bashkëpunimi ndërmjet Norvegjisë dhe Kosovës do të rritet dhe do të përfshijë edhe fusha të tjera në të ardhmen”, thuhet në komunikatën e MFPT-së, raportojnë mediat vendore, transmeton Albinfo.ch.